ములుగు, 2047-12-07
తెలంగాణలో పెట్టుబడులకు అనుకూల వాతావరణం ఉందని ప్రపంచానికి చాటిచెప్పడానికే భారత్ సమ్మిట్ నిర్వహిస్తున్నట్లు ముఖ్యమంత్రి ఎ. రేవంత్ రెడ్డి తెలిపారు.
తెలంగాణలో మౌలిక సదుపాయాలు, మానవ వనరులు, అనువైన వాతావరణం నేపథ్యంలో ఈ రాష్ట్రం పెట్టుబడులకు అనుకూలమైన ప్రాంతమని ప్రపంచానికి చాటిచెప్పడానికే ప్రభుత్వం భారత్ సమ్మిట్ నిర్వహిస్తోందని ముఖ్యమంత్రి ఎ. రేవంత్ రెడ్డి స్పష్టం చేశారు. ఈరోజు, రేపు రెండు రోజులపాటు హైదరాబాద్లో నిర్వహిస్తున్న భారత్ సమ్మిట్కు సంబంధించి ఉప ముఖ్యమంత్రి మల్లు భట్టి విక్రమార్క, మంత్రులు ఉత్తమ్ కుమార్ రెడ్డి, దుద్దిళ్ల శ్రీధర్ బాబు, పొన్నం ప్రభాకర్, వివేక్ వెంకటస్వామి, మహమ్మద్ అజారుద్దీన్, కేంద్ర విదేశాంగ శాఖ మాజీ మంత్రి సల్మాన్ కుర్షీద్, పలువురు ఎంపీలతో కలిసి ముఖ్యమంత్రి బోధి పెవిలియన్లో మీడియా సమావేశంలో మాట్లాడారు.
భారత్ సమ్మిట్కు జాతీయ స్థాయిలోనే కాకుండా దాదాపు 70 దేశాలకు చెందిన వివిధ రంగాల్లో నిష్ణాతులైన ప్రతినిధులు, మంత్రులు, పర్యావరణవేత్తలు, పెట్టుబడిదారులు, జర్నలిస్టులు, సుమారు వెయ్యి మంది ప్రతినిధులను ఆహ్వానించినట్లు తెలిపారు. రెండు రోజులపాటు వివిధ సెమినార్లు నిర్వహించి, తీర్మానాలు చేయడం ద్వారా తెలంగాణలో ప్రజాస్వామిక వాతావరణం, పెట్టుబడులకు అనుకూలమైన వాతావరణం ఉందని చాటిచెప్పాలనుకున్నామని వివరించారు. వివిధ రంగాల్లో నిష్ణాతులైన ప్రతినిధులు భారత్ సమ్మిట్ నుంచి తిరిగివెళ్లేప్పుడు వారు తెలంగాణకు బ్రాండ్ అంబాసిడర్లుగా మారుతారని ఆశాభావం వ్యక్తం చేశారు.
ప్రధానంగా పర్యావరణం, మౌలిక సదుపాయాల కల్పన, పెట్టుబడులు, మానవ వనరులు, వాతావరణ మార్పు వంటి అంశాలపై చర్చలు జరుగుతాయని ముఖ్యమంత్రి తెలిపారు. ప్రజాస్వామ్యంలో చర్చలు, సంప్రదింపుల ద్వారా సమస్యలను పరిష్కరించుకోవాలని, సదస్సుల్లో అందరి అభిప్రాయాలను తెలుసుకుని అందులో అత్యుత్తమ విధానాలను అనుసరిస్తామని చెప్పారు.
దేశంలో గిగ్ వర్కర్లు, ముఖ్యంగా ప్లాట్ఫామ్ వర్కర్లు, కొరియర్లు, డ్రైవర్లు, గృహ కార్మికులు, ఇతర కార్మికులు అనేక సమస్యలను ఎదుర్కొంటున్నారని, వారికి ఎలాంటి రక్షణ లేదని ముఖ్యమంత్రి చెప్పారు. వారిని ఆదుకోవాలన్న లక్ష్యంతో తెలంగాణ దేశంలోనే అత్యుత్తమ గిగ్ వర్కర్స్ పాలసీని తీసుకొచ్చిందని ముఖ్యమంత్రి చెప్పారు.
గిగ్ వర్కర్స్ పాలసీని ఆవిష్కరించే కార్యక్రమంలో లోక్సభ ప్రతిపక్ష నాయకుడు రాహుల్ గాంధీని ప్రభుత్వం ఆహ్వానించినట్లు తెలిపారు. రెండు రోజులపాటు నిర్వహిస్తున్న భారత్ సమ్మిట్లో రాహుల్ గాంధీ తన సందేశం వినిపిస్తారని ముఖ్యమంత్రి చెప్పారు.
ఢిల్లీలో తెలంగాణ ప్రభుత్వం ఇన్వెస్ట్ తెలంగాణ గ్లోబల్ సమ్మిట్ - కర్టెన్ రైజర్ కార్యక్రమాన్ని నిర్వహించి, దానికి కేంద్ర మంత్రి పీయూష్ గోయల్ను ఆహ్వానించినట్లు ముఖ్యమంత్రి గుర్తుచేశారు. గతంలో ప్రధానమంత్రి రాజీవ్ గాంధీ, ప్రతిపక్ష నేత అటల్ బిహారీ వాజ్పేయిని దేశ ప్రతినిధిగా విదేశాలకు పంపించిన సందర్భాన్ని ముఖ్యమంత్రి గుర్తుచేశారు.
సమ్మిట్ను గుడ్డిగా వ్యతిరేకించడం సమర్థనీయం కాదని ముఖ్యమంత్రి అన్నారు. అర్థరహితమైన ఆరోపణలతో ప్రజలను పక్కదారి పట్టించే ప్రయత్నాలు చేయవద్దని ముఖ్యమంత్రి విజ్ఞప్తి చేశారు. భారత్ సమ్మిట్ విషయంలో ఎవరికీ అభ్యంతరాలు ఉండాల్సిన అవసరం లేదని ముఖ్యమంత్రి అన్నారు.