నేలకొండపల్లి, 10 November
జిల్లాలో వివిధ దశల్లో అసంపూర్తిగా నిలిచిపోయిన రెండు పడక గదుల ఇళ్లను, వాటి ప్రస్తుత స్థితిలోనే ఇందిరమ్మ ఇళ్ల లబ్ధిదారులకు కేటాయించేందుకు చర్యలు చేపట్టాలని జిల్లా కలెక్టర్ దివాకర టి.ఎస్. అధికారులను ఆదేశించారు.
మంగళవారం జిల్లా వ్యాప్తంగా పలు మండలాల్లోని అసంపూర్తి డబుల్ బెడ్ రూం ఇళ్లను కలెక్టర్ క్షేత్రస్థాయిలో పరిశీలించారు. మండలం గువ్వలగూడెం గ్రామంలో 30, సింగిరెడ్డిపాలెం గ్రామంలో 48, శంకరగిరి తండాలో 30, కూసుమంచి మండలం మల్లెపల్లి గ్రామంలో 16, ఖమ్మం అర్బన్ మండలం దంసలాపురంలో 192 ఇళ్లను ఆయన పరిశీలించి, ప్రస్తుత నిర్మాణ స్థితిగతులపై అధికారుల నుంచి వివరాలు అడిగి తెలుసుకున్నారు.
లబ్ధిదారుల ఎంపికపై ఆదేశాలు
ఈ సందర్భంగా కలెక్టర్ మాట్లాడుతూ, ఇళ్ల నిర్మాణాలు ఏ దశలో ఉన్నాయో, అదే స్థితిలో పూర్తి చేసుకోవడానికి అంగీకరించే ఇందిరమ్మ ఇళ్ల లబ్ధిదారులను గుర్తించి కేటాయించాలని కలెక్టర్ సూచించారు. లబ్ధిదారుల ఎంపిక ప్రక్రియను పూర్తి పారదర్శకంగా, ఎలాంటి పొరపాట్లకు తావులేకుండా చేపట్టాలని ఆయన స్పష్టం చేశారు.
మౌలిక సదుపాయాల కల్పన
అలాగే, ఇళ్ల సముదాయాల వద్ద విద్యుత్, పారిశుధ్యం, తాగునీటి సరఫరా వంటి మౌలిక సదుపాయాల కల్పనకు ప్రతిపాదనలు సిద్ధం చేయాలని ఆదేశించారు.
కలెక్టర్ వెంట హౌసింగ్ పీడీ భూక్యా శ్రీనివాస్, తహశీల్దార్లు రాంప్రసాద్, సైదులు, విజయేందర్ రెడ్డి, జయచంద్ర, హౌసింగ్ డీఈ కె.జగ్రామ్, ప్రజాప్రతినిధులు, తదితరులు పాల్గొన్నారు.
