ప్రత్యేక ఎస్టీ కమిషన్ ఏర్పాటు గిరిజన సమాఖ్య పోరాట ఫలితం: బానోత్ రాంబాబు నాయక్

తెలంగాణ రాష్ట్రంలో ఇప్పటివరకు ఎస్సీ, ఎస్టీలకు ఉమ్మడిగా కొనసాగుతున్న కమిషన్ను వేరుచేసి, గిరిజనుల హక్కుల పరిరక్షణ, సంక్షేమం కోసం ప్రత్యేక ఎస్టీ కమిషన్ ఏర్పాటు చేస్తూ ప్రభుత్వం ఉత్తర్వులు జారీ చేయడంపై తెలంగాణ గిరిజన సమాఖ్య హర్షం వ్యక్తం చేసింది.

ఇది గిరిజన సంఘాల నిరంతర పోరాటానికి, ముఖ్యంగా గిరిజన సమాఖ్య ఉద్యమానికి దక్కిన విజయమని ఆ జిల్లా అధ్యక్షుడు బానోత్ రాంబాబు నాయక్ పేర్కొన్నారు.

పోరాటాల ఫలితమే ప్రత్యేక కమిషన్

ఈ సందర్భంగా ఆయన మాట్లాడుతూ, నిరంతర ఉద్యమాలు, పోరాటాల ఫలితంగానే ప్రత్యేక ఎస్టీ కమిషన్ ఏర్పాటు సాధ్యమైందన్నారు. గిరిజనుల దశాబ్దాల ఆకాంక్షను గుర్తించి ప్రత్యేక కమిషన్ ఏర్పాటుకు ఉత్తర్వులు జారీ చేసిన ముఖ్యమంత్రి రేవంత్ రెడ్డి ప్రభుత్వానికి, రెవెన్యూ శాఖ మంత్రి పొంగులేటి శ్రీనివాసరెడ్డికి తెలంగాణ గిరిజన సమాఖ్య తరఫున ప్రత్యేక కృతజ్ఞతలు తెలిపారు.

సమగ్ర అభివృద్ధికి డిమాండ్

గిరిజన సమాఖ్య ఆవిర్భావం నుంచి గిరిజనుల హక్కుల పరిరక్షణ, సంక్షేమం, తండాల అభివృద్ధి లక్ష్యంగా నిరంతరం పోరాడుతోందని పేర్కొన్నారు. ప్రత్యేక ఎస్టీ కమిషన్ ఏర్పాటుతో గిరిజనులకు న్యాయం జరిగే దిశగా మరో కీలక ముందడుగు పడిందని ఆశాభావం వ్యక్తం చేశారు.

అయితే ప్రత్యేక కమిషన్ ఏర్పాటు ఒక్కటే సరిపోదని, గిరిజనుల సమగ్ర అభివృద్ధి కోసం కాంగ్రెస్ పార్టీ గతంలో చేవెళ్లలో ప్రకటించిన చేవెళ్ల డిక్లరేషన్ను కూడా ప్రభుత్వం వెంటనే పూర్తిస్థాయిలో అమలు చేయాలని డిమాండ్ చేశారు.

గిరిజనుల విద్య, వైద్యం, ఉపాధి, భూమి హక్కులు, తండాల మౌలిక సదుపాయాలపై ప్రభుత్వం ప్రత్యేక దృష్టి సారించాలని కోరారు.